S'ARDIA de Montanaru

Curren s'ardia! Caddos galiardos

E cavalleris lean sa falada

A tottu cursa, a briglia abbandonada

Pesende gloriosos istendardos.

Faghen proas terribiles d'azzardos

Pro cudda antiga fide ereditada

Dae Santu Antine, e consagrada

Dae sos generosos coros sardos.

E benin da ogni idda e Sardigna

A bider s'Ardia, a bider s'ispettaculu

De custa antiga moda Sedilesa.

E i sa idda e Sedilo benigna

E fiera, rinnoat su meraculu

In custa festa 'e forza e de bellesa.